KŌNOPIŎTKA

Zupa na Wilijŏ, kerŏ warzi sie ze siymiyniŏ kōnopnego i keryj gorsko-słōny smak niy przipōminŏ niczego inkszego. Jedyne prawe ôryginalne danie kuchni ślōnskij.
SKŁŎDNIKI:
Siymie kōnopne trocha tak na ôko, ale wiela, woda, cybula, sōl, korzynie, ziylynina jak na rosōł.
ZRYCHTOWANIE:
Siymie zalywŏ sie wodōm i tŏplŏ. Dugo. Potym trza warzić pŏra godzin, aże ôbtyngnie i napyncznieje. Dalij trza to wyklupać. Biere sie drzywiany tuczek albo cosik inszego podanego i trzaskŏ uwarzōne siymie w gŏrku. Potym ze ôbtrzaskanego ôdsōnczŏ sie mlyczko bez gaza, do nowego gŏrka. A co ôstanie zaś sie tucze i zaś przesōnczŏ bez gaza. I juzać tucze i juzaś przesōnczŏ. Jeźli sōm żeście już fest zmachane
i wydŏwŏ sie wōm, co wytukliście już milijōn rŏzōw, a odsōnczyli już ze dwa milijōny, to znŏczy, co sōm żeście może w pōłowie roboty. Nŏjważniyjsze, coby czŏrne łupinki ziŏrek ôstały we jednym miejscu, a szaro-biŏłe mlyczko we drugim. I niy bydzie ańfach, wielgŏ czyńść synsu kōnopiŏtki polygŏ na tym, co niy ma ańfach. Do szarobiŏłego mlyczka dodŏwŏ sie dalij: soli, korzyni i warzi sie w nim pociachanŏ cybula i ziylynina. Ziylynina sie wyciōngŏ, cybula już ôstŏwŏ. I fertich. Zupōm zalywŏ sie kupki krupōw pogańskich na talyrzach.

MAKŌWKI

SKŁŎDNIKI:
Pōł fōnta maku, 2-3 czyrstwe żyłmy, 1 liter zawarzōnej wody, 4 łyżki cukru, 2 łyżki miodu, 1 tytka cukru wanilijowego, 2 łyżki roztopiōnego masła, szklōnka pōmlōnych ôrzechōw włoskich, szklōnka pōmlōnych ôrzechow lyskowych, pōł szklōnki pōmlōnych mandlōw, pōł szklōnki rozynkōw.
ZRYCHTOWANIE:
Bakalie trzimać kole 1 godziny we wrzōntku, potym ôdcedzić. Mak zalŏ wrzōncōm wodōm, wciepnōń cuker a miōd, uwarzić. Żymły pokrajać we plastry, położyć piyrszŏ szichta we wcześnij narychtowanyj misce. Zalŏ makiym tak, coby zakrōł trocha kōncki żymłōw. Posypać bakaliōma. Szichty ukłŏdać aże do kōńca miski abo skłŏdnikŏw. Wrazić do kilszranku i trzimać bez cołkŏ noc.

MOCZKA

SKŁŎDNIKI:
2 litry wody, 200 g piernika, 300 g rozynkōw (jasne, ciymne, sułtańske), 100 g suszonych śliwkōw, 150 g ôrzechōw włoskich, 150 g mandlōw, 150 g suszonych moreli, 200 g gorzkij szekulady, pōl litra kōmpotu truskawkowego abo ze śliwkōw wyngierkōw, pōł litra kōmpotu z wieprzkōw, 1 cuker wanilijowy, sok z pōł cytrōny.
ZRYCHTOWANIE:
Dziyń przed Wilijōm pokrŏ piernik w kostka i potōnkać w zawarzōnej, ôstudzōnejwodzie. We Wilijŏ rano zawarzić piernik, dodać posiekane ôwoce i ôrzechy, fyrlać w czasie warzyniŏ. Na kōniyc warzyniŏ dodać szekulada i mandle. Narychtować zasmażka z masła i mōnki pszynnyj
i dodać do moczki. Na sōm kōniyc dolŏ kōmpoty i sok z cytrōny. Trzimać w ôziōmbniyntym miejscu, podŏwać na zimno.

FISZ-ZŌUZA

SKŁŎDNIKI:
2 gowy kapra, 2 ôgōny kapra, 1 petersyla, 1 markew, 1 zeler, 1 cybula, piernik do ryby, 250 g śmietōny kwaśnyj 18%, 100 g rozynkōw, 1 tytka płatkōw mandlōw, 2 laski kōrzicy, 1 łyżka stōłowŏ mōnki, 1cytrōna, sōl, cuker.
ZRYCHTOWANIE:
Warzimy ôsōlōny aufgus ze ryby i ziylyniny, potym cedzymy. Piernik tōnkōmy w wodzie, mlyku abo piwie, dodŏwŏmy do aufgusu. Do wszyjskego dodŏwŏmy rozynki, płatki mandlōw i dwa kōnski kōrzicy. Na kōńcu zalywōmy śmietōnōm rozfyrlanōm z łyżkōm stołowōm mōnki. Doprŏwiōmy cytrōnōm a cukrym do smaku.